मुंबईतील व्यक्तीचा मृतदेह श्रीरामपुरातील लॉजमध्ये; नेमकं काय घडलं?

 :श्रीरामपूर शहरातील सूर्या लॉजमध्ये बोरीवली मुंबई येथील उमर मेहबूब शेख (वय ५२) यांचा मृतदेह आढळून आला आहे. त्यांचा मृत्यू कशामुळे आणि केव्हा झाला हे मात्र अद्याप स्पष्ट झालेले नाही. मृतदेह कुजला असल्याने परिसरात दुर्गंधी पसरल्यावर हे गोष्ट लक्षात आली. १५ मार्चपासून शेख या लॉजमध्ये थांबले होते.या मृतदेहासंबंधी माहिती मिळाल्यावर पोलिसांनी लॉजच्या खोलीचा दरवाजा तोडून मृतदेह ताब्यात घेतला आहे. तेथे आढळून आलेल्या कागदपत्रांवरून मृतदेहाची ओळख पटली असली तरी नातेवाईकांशी अद्याप संपर्क झालेला नाही. शेख यांनी १५ मार्च रोजी या लॉजमध्ये खोली घेतली होती. ते एकटेच होते. तीन दिवसांपासून ते बाहेर आले नव्हते. त्यानंतर त्यांच्या रूममधून कुजलेला असा वास येऊ लागला. त्यामुळे लॉज मालकांनी श्रीरामपूर शहर पोलिसांना माहिती दिली. पोलिसांनी लॉजवर येऊन खोलीचा दरवाजा तोडला. आतमध्ये कुजलेल्या अवस्थेतील मृतदेह होता. खोलीत औरंगाबाद येथील एका रुग्णालयाची फाईल आढळून आली. त्यावरून शेख तेथे उपचार घेण्यासाठी गेले असावेत, असा अंदाज आहे. तेथे मिळालेल्या अन्य कागदपत्रांवरून ओळख पटली. पोलिसांनी नातेवाईकांशी संपर्क करण्याचे प्रयत्न सुरू केले आहेत.

मृतदेह पोलिसांनी ताब्यात घेऊन रुग्णलयात तपासणीसाठी पाठविला आहे. कुजल्याने मृतदेहाची अवस्था अत्यंत वाइट झाली असून परिसरात दुर्गंधी पसरली आहे. अधिक तपास सुरू असल्याचे पोलिसांकडून सांगण्यात आले.