नाशिक : दोन अल्पवयीन मुलींचा विनयभंग, खंडणीची मागणी करीत केली दमदाटी

नाशिक  : शहरात दोन वेगवेगळ्या घटनांमध्ये तरुणांनी अल्पवयीन मुलींशी ओळख वाढवून त्यांच्या अज्ञानपणाचा गैरफायदा घेत विनयभंग केल्याचे उघडकीस आले आहे. यापैकी एकाने पीडितेकडे खंडणीची मागणी करीत दमदाटी केल्याचेही समोर आले आहे. याप्रकरणी इंदिरानगर पोलिस ठाण्यात पोक्सोसह विनयभंगाचे दोन गुन्हे दाखल करण्यात आले आहेत.

पीडित मुलीच्या आईने दिलेल्या फिर्यादीनुसार संशयित सोहम प्रविण वनमाळी (२१, रा. टाकळीरोड, द्वारका) याने नोव्हेंबर २०२१ ते मे २०२२ या कालावधीत राजीवनगर परिसरात पीडितेचा विनयभंग केला. संशयित सोहम याने पीडितेच्या इच्छेविरोधात जवळीक साधून व्हॉट्सअपवर अश्लिल मेसेज पाठवले. त्याचप्रमाणे तिस व्हिडीओ कॉलवरून अश्लिल कृत्य करण्यास भाग पाडून व पैशांची मागणी केली. तसे न केल्यास सोहमने पीडितेस बदनामी करण्याची धमकी दिली. याप्रकरणी इंदिरानगर पोलिस तपास करीत आहेत.

तर दुसऱ्या घटनेत संशयित नितीन कैलास खातळे (रा. करुळे, ता. इगतपुरी) याने पाथर्डी फाटा येथील दामोदर नगर परिसरातील १६ वर्षीय मुलीस लग्नाचे आमीष दाखवले. सुमारे वर्षभरापासून नितीनने पीडितेचा पाठलाग करून ओळख वाढवली. तिला मोबाइल देत तिच्याशी संपर्क ठेवला. याबाबत पीडितेच्या पालकांनी नितीनला समजावण्याचा प्रयत्न केला असता त्याने पालकांना जीवे मारण्याची धमकी दिली. याप्रकरणी नितीन विरोधात गुन्हा दाखल केला असून इंदिरानगर पोलिस तपास करीत आहेत.