हैवान वृत्ती! अल्पवयीन मुलीला ओढत नेत शेतात बलात्कार, अंघोळ करताना पाहिलं आणि...

औरंगाबाद : औरंगाबादमध्ये बलात्काराचा एक धक्कादायक प्रकार समोर आला आहे. इथे एका १६ वर्षीय अल्पवयीन मुलीला बाथरूममध्ये अंघोळ करीत असल्याचे पाहताच २१ वर्षीय नराधमाने तिचं तोंड दाबून फरपटत शेतात नेत बलात्कार केल्याची घटना गंगापूर तालुक्यातील गवळीशिवरा गावात घडली. या घटनेमुळे संपूर्ण परिसरात खळबळ उडाली असून पोलीस तपास सुरू असल्याची माहिती आहे.

अधिक माहितीनुसार, शिल्लेगाव पोलिसांनी आरोपीच्या मुसक्या आवळल्या असून पुढील तपास पोलीस करीत आहेत. अनिकेत उर्फ अन्या ज्ञानेश्वर चव्हाण वय-२१वर्ष (रा. गवळीशिवरा, ता. गंगापूर) असे पोलिसांनी अटक केलेल्या नराधमाचे नाव आहे.

या प्रकरणी पोलिसांकडून मिळालेल्या माहितीनुसार, शुक्रवारी पहाटे साडेचार ते पाच वाजेच्या सुमारास अल्पवयीन पीडितेला अंघोळीसाठी बाथमरूममध्ये जाताना आरोपी अनिकेतने पाहिले होते. बाथरूममध्ये जाताच आरोपीने पीडितेचे तोंड दाबून तिला फरपटत गायरान शेतीमध्ये घेऊन गेला. तेथील पाण्याच्या हौदा शेजारी तिला जीवे मारण्याची धमकीदेत पाशवी बलात्कार केला आणि पसार झाला.

भेदरलेल्या पीडितेने घडलेली घटना तिच्या घरच्यांना सांगितली. या प्रकरणी शिल्लेगाव पोलीस ठाण्यात बाल लैंगिक अत्याचार प्रतिबंधक कायद्यानुसार शिल्लेगाव पोलीस ठाण्यात गुन्हा दाखल करण्यात आला आहे. पोलिसांनी नराधम आरोपीला अटक केली आहे. या घाटनेमुळे पुन्हा महिला सुरक्षिततेचा प्रश्न ऐरणीवर आला आहे.