सीडीआर-एसडीआर प्रकरणाने अकोला पोलिसांना हादरे, अधीक्षकांनी नेमली चौकशी समिती

अकोला पोलिसांनी संशयित आरोपी दाखवत अनेकांचे सीडीआर आणि एसडीआर काढल्याचा धक्कादायक प्रकार समोर आलाय. अकोल्यातील अॅड नजीब शेख यांचा सीडीआर आणि एसडीआर काढण्यात आल्याने हा प्रकार उजेडात आला. यासंदर्भात पोलीस अधीक्षकांकडे तक्रार दाखल झाली. पोलीस अधीक्षकांनी यासंदर्भात चौकशी समिती नेमली आहे. उपविभागीय पोलिस अधिकारी या प्रकरणाची चौकशी करताहेत. संशयित आरोपी दाखवून अॅड नजीब यांचा कॉल डिटेल रेकॉर्ड काढला गेला. लवकरचं आता सीडीआर प्रकरणाचा पर्दाफाश अकोला पोलीसांकडून होणारेय. नेमका कुणाच्या आदेशाने आणि कशासाठी हा रेकॉर्ड काढला गेला, याचाही तपास सुरू आहे 

नेमका काय आहे प्रकार?

वकील नजीब शेख यांनी केलेल्या तक्रारीनुसार अकोला पोलिसांच्या स्थानिक गुन्हे शाखाचे तत्कालीन पोलीस निरीक्षक शैलेश सपकाळ यांनी पदाचा गैरवापर करून नामांकित वकील अॅड नजीब शेख यांना गंभीर गुन्ह्यातील संशयित आरोपी दाखवून त्यांच्या मोबाइल नंबरचा सीडीआर आणि एसडीआर काढला आहे. अॅड नजीब शेख यांच्या वैयक्तिक गोपनीयतेचे हनन केल्याप्रकरणी सपकाळ यांच्यावर गुन्हे दाखल करण्यात यावे, या मागणीसाठी जिल्हा पोलीस अधीक्षक कार्यालयासमोर धरणे आंदोलन पुकारण्यात येणार होते. मात्र, जिल्हा पोलीस अधीक्षक जी. श्रीधर यांनी आंदोलनापूर्वीच तक्रारदारांशी चर्चा करून या प्रकरणात तपास अधिकारी म्हणून उपविभागीय पोलीस अधिकारी सुभाष दुधगांवकर यांची नियुक्ती केली. तसेच येत्या ७ दिवसांत तपास पूर्ण करण्याच्या सूचना दिल्या. त्यामुळे हे आंदोलन मागे घेण्यात आलेत, अशी माहिती वकील नजीब शेख यांनी दिली. खदान पोलीस ठाण्यात दाखल असलेल्या घरफोडी गुह्यात नजीब यांना संशयित आरोपी दाखवून त्यांच्या मोबाइल क्रमाकांचा सीडीआर आणि एसडीआर मिळवला होता.

यासाठी काढले कॉल डिटेल रेकॉर्ड...

२०२१ मध्ये अकोला पोलिसांच्या स्थानिक गुन्हे शाखेत कार्यरत असलेल्या चार ते पाच पोलिस कर्मचाऱ्यांनी चक्क गृहमंत्र्यांच्या नावावर एका ट्रान्सपोर्ट व्यावसायिकाला १० लाख रुपयांची खंडणी मागितली होती. तसेच तब्बल आठ तास त्यांना एलसीबी बसवून ठेवले होते. या प्रकरणाची न्यायालयीन चौकशी सुरू असताना पोलिसांनी वकील नजीब शेख यांचे सीडीआर आणि एसडीआर काढले होते. या प्रकरणी त्यांनी माहिती अधिकारात माहिती मागितली आणि हे सर्व प्रकरण उजेडात आले.