आजारी महिलेला आधी इंजेक्शन दिलं, नंतर केलं घृणास्पद कृत्य; डॉक्टरने व्हिडिओही काढला

उत्तर प्रदेशातील गोंडा जिल्ह्यात एक धक्कादायक घटना उघडकीस आली आहे. एका बोगस डॉक्टरने उपचारांसाठी आलेल्या आजारी महिलेला झोपेचे इंजेक्शन देत तिच्यावर अत्याचार केले. या घृणास्पद कृत्याचा व्हिडिओही त्याने काढला.

या घटनेची माहिती परिसरातील नागरिकांना समजली. त्यानंतर नागरिक प्रचंड संतापले. त्यांनी आरोपी डॉक्टरविरोधात कठोर कारवाई करण्याची मागणी केली. या घटनेमुळे परिसरात तणाव निर्माण झाला होता. कोणताही अनुचित प्रकार घडू नये म्हणून परिसरात पोलीस बंदोबस्त तैनात करण्यात आला होता. तर जिल्हा आरोग्य विभागाच्या पथकाने आरोपी डॉक्टरचे क्लिनिक सील केले आहे.

मिळालेल्या माहितीनुसार, खरगपूर पोलीस ठाण्याच्या हद्दीतील बिसुनापूर बाजारात अजमल नावाची व्यक्ती क्लिनिक चालवतो. मागील बुधवारी त्याच्या क्लिनिकमध्ये उपचारांसाठी एक रुग्ण महिला आली. त्यावेळी आरोपी डॉक्टरने महिलेला झोपेचे इंजेक्शन दिले. त्यानंतर महिला तिथेच निपचित पडली. आरोपीने तिच्यावर अत्याचार केला. या कृत्याचा व्हिडिओही त्याने काढला. दुसऱ्या दिवशी हा व्हिडिओ सोशल मीडियावर व्हायरल झाल्यानंतर नागरिकांमध्ये प्रचंड संताप होता.

आरोपी डॉक्टरविरुद्ध गुन्हा दाखल 

घटनेची माहिती मिळताच पोलिसांचे 

पथक आरोपीच्या क्लिनिकमध्ये पोहोचले. मात्र, तोपर्यंत तो क्लिनिक बंद करून फरार झाला होता. पीडित महिलेच्या तक्रारीवरून पोलिसांनी तात्काळ कारवाई करत बोगस डॉक्टरविरोधात गुन्हा दाखल केला.

या घटनेनंतर परिसरातील नागरिकांनी संताप व्यक्त केला. ते रस्त्यावर उतरले होते. आरोपीविरोधात पोलिसांनी कठोर कारवाई करावी, अशी मागणी त्यांनी लावून धरली. तसेच बाजारपेठ बंद करण्यात आली होती. संतप्त नागरिकांनी आरोपीच्या घरावर बुलडोझर फिरवला जावा, अशी मागणी केली. त्याच दिवशी संध्याकाळी पोलिसांनी आरोपीला अटक केली.

क्लिनिकमध्ये सापडली बंदी घातलेली औषधे

पोलिसांनी क्लिनिकमध्ये झडती घेतली असता, अनेक बंदी घातलेली औषधे सापडली. त्यानंतर आरोग्य विभागाच्या पथकाने कारवाई करत क्लिनिक सील केले आहे. या प्रकरणी आरोपी डॉक्टरविरोधात विविध कलमान्वये गुन्हे नोंदवले आहेत