ऐन दिवाळीत शोककळा; नाशिकच्या भूमिपुत्राला कर्तव्यावर असताना वीर मरण

नाशिक : तालुक्यातील गावातील लवहित गावातील भारतीय सैन्यामध्ये असलेले तोफखाना केंद्राच्या २८५ मिडीयम रेजिमेंटचे लान्सनायक संतोष विश्वनाथ गायकवाड हे आसाम येथे कर्तव्य बजावत असताना शहीद झाले आहेत. सर्वत्र दिवाळी सणाचा आनंद पसरलेला असताना नाशिकच्या गायकवाड कुटुंबावर मोठा दुःखाचा डोंगर कोसळला आहे. संतोष गायकवाड यांचे शहीद झाल्याचे वृत्त समजतात संपूर्ण लवहित पंचक्रोशीत शोककळा पसरली आहे. ऐन दिवाळीच्या दिवशी भारत मातेचे सुपुत्र संतोष गायकवाड हे शहीद झाल्याने सर्वत्र हळहळ व्यक्त केली जात आहे.

शेतकरी कुटुंबातून संतोष गायकवाड हे भारतीय सैन्य दलात तोफखान्याच्या माध्यमातून दाखल झाले होते. शहीद संतोष गायकवाड लष्करात भरती होऊन सोळा वर्षे भारत मातेची सेवा केली होती. ते दहा महिन्यांनी सेवानिवृत्त होणार होते, पंरतु त्याअगोदरच त्यांना कर्तव्य बजावत असताना वीरमरण आले.त्यांचे पार्थिव नाशिक रोडच्या तोपखाना केंद्रात आज रात्री बारा वाजेपर्यंत दाखल होण्याची शक्यता लष्कराच्या सूत्रांनी वर्तवली आहे.शहीद संतोष गायकवाड यांच्यामुळे गावी लष्करी इतमातात अंत्यसंस्कार करण्यात येणार आहे

शहीद जवान संतोष गायकवाड हे सिक्कीमच्या उत्तरेला आसाम राज्यातील होजाई जिल्ह्यातील लंका शहराजवळ बर्फाळ प्रदेशात कर्तव्यावर असताना रक्त गोठविणाऱ्या थंडीमुळे त्यांना अचानकपणे मेंदूमध्ये त्रास झाला यावेळी रेजिमेंटकडून तत्काळ त्यांना कोलकत्याच्या रुग्णालयात दाखल करण्यात आले होते. तिथे दोन दिवसांपूर्वीच त्यांच्या मेंदूवर शस्त्रक्रिया करण्यात आली होती, परंतु दुर्दैवाने आज पहाटे ३ वाजून ५० मिनिटांनी त्यांची प्राणज्योत मालवली शहीद संतोष गायकवाड यांच्या पश्चात आई-वडील पत्नी तीन मुली मुलगा दोन भाऊ असा परिवार आहे.

सर्वत्र दिवाळी सणाचा उत्साह असताना नाशिक मधील लवहित गावच्या गायकवाड कुटुंबीयांवर भारतीय सैन्य दलातील जवान संतोष गायकवाड यांच्या शहीद झाल्याच्या वृत्ताने शोककळा पसरली आहे. भाऊबीजेचा सण एक दिवस बाकी असतानाच संतोष गायकवाड यांनी रुग्णालयात उपचार सुरू असताना कोलकता येथे अखेरचा श्वास घेतला संतोष गायकवाड यांच्या शहीद होण्याच्या वृत्ताने केवळ गायकवाड कुटुंबीयांवरच नव्हे तर संपूर्ण नाशिक वर शोककळा पसरली आहे.