भयंकर! महिलेचे कपडे फाडले, नग्न करुन बेदम मारहाण, लघवी पाजली; कुटुंब दहशतीत

महिलेचे कपडे काढून तिला अमानुषपणे मारहाण करण्यात आली. तिला गावात फिरवण्याची धमकी देण्यात आली. तिच्या तोंडात लघवी करण्यात आली. या प्रकरणात अद्याप कोणालाही अटक करण्यात आलेली नाही.

पाटणा: उधारीचे पैसे वसूल करण्यासाठी महिलेला निर्वस्त्र करुन मारहाण करण्यात आली. त्यानंतर तिला लघवी पाजण्यात आली. मारहाणीदरम्यान महिलेच्या डोक्याला इजा झाली. रक्तस्राव सुरू झाला. घटनेमुळे महिलेचं कुटुंब दहशतीखाली आबे. घटनेची माहिती मिळताच पोलीस सक्रिय झाले. पण अद्यापही आरोपींना अटक झालेली नाही. घटना बिहारची राजधानी पाटण्यातील आहे.

पाटण्यातील महादलित समाजातील महिलेसोबत अमानुष प्रकार घडला. उधार घेतलेल्या पैशांवरील व्याज भरता न आल्यानं महिलेला कपडे काढून मारहाण करण्यात आली. त्यानंतर तिला लघवी पाजण्यात आली. खुशरुपूर पोलीस ठाण्याच्या हद्दीत येणाऱ्या गावात ही घटना घडली. या गावात महादलितांची वस्ती आहे. या वस्तीत राहणाऱ्या महिलेनं गावातच राहणाऱ्या प्रमोद सिंहकडून काही महिन्यांपूर्वी १५०० रुपयांचं कर्ज घेतलं होतं.

प्रमोद सिंहला कर्जाची रक्कम व्याजासह परत केली. पण त्यानंतर त्याची नियत फिरली. त्यानं महिलेकडे पैशांसाठी तगादा लावला आणि पैसे मागण्यासाठी माणसं पाठवू लागला. शनिवारी सकाळी प्रमोदनं महिलेला मारहाण केली. प्रमोद आणि त्याच्या साथीदारांनी महिलेचे कपडे फाडले. तिला गावभर फिरवण्याची धमकी दिली. पोलिसांनी प्रमोद विरोधात कोणतीही कारवाई केलेली नाही.

रात्री दहाच्या सुमारास महिला घरातून बाहेर पडली. तेव्हा प्रमोदचा मुलगा अंशूनं त्याच्या ४ मित्रांसह महिलेला पकडलं. तुझा पती आमच्या ताब्यात आहे. आमच्या सोबत चल, अन्यथा त्याचा जीव घेऊ, अशी धमकी त्यांनी दिली. घाबरलेली महिला अंशूसोबत प्रमोदच्या घरी गेली. तिथे तिला काठ्यांनी मारहाण करण्यात आली. प्रमोदच्या सांगण्यावरुन अंशूनं तिच्या तोंडात लघवी केली. मारहाणी दरम्यान महिलेचं डोकं फुटलं. तिनं कशीबशी स्वत:ची सुटका केली आणि नग्नावस्थेत घर गाठलं. महिलेच्या तक्रारीवरुन प्रमोद, त्याचा मुलगा अंशू आणि त्याच्या काही साथीदारांविरोधात गुन्हा नोंदवण्यात आला आहे. पण कोणालाही अटक झालेली नाही.