अकोल्यात पेट्रोल'चे दर ८० ते ९० रुपये प्रति लीटर! कारण की.....

याचाच फायदा आता पेट्रोलचा काळाबाजार करणाऱ्या व्यक्तींनी घेतला आहे. दरम्यान, दरामध्ये सातत्याने होत असणाऱ्या वाढीचा परिणाम पाहता काळाबाजार करणाऱ्यांनी आता पेट्रोलची किंमत ८० ते ९० रुपये प्रति लीटर ठेवली आहे.

 

अकोला : पेट्रोल आणि डिझेलचे दर दिवसेंदिवस वाढत आहेत. याचाच फायदा आता पेट्रोलचा काळाबाजार करणाऱ्या व्यक्तींनी घेतला आहे. दरम्यान, दरामध्ये सातत्याने होत असणाऱ्या वाढीचा परिणाम पाहता काळाबाजार करणाऱ्यांनी आता पेट्रोलची किंमत ८० ते ९० रूपये प्रति लीटर ठेवली आहे. हे खरं आहे, यामागचं कारण विशेष आहे. अकोला जिल्ह्यातील गायगाव येथे पेट्रोल डेपो आहे. या पेट्रोल डेपो'मधून इंधनाचा मोठा काळाबाजार सुरु आहे. काळ्याबाजारात पेट्रोल ८० ते ९० रूपये प्रति लीटर'ने विकले जात आहे. आज अशाच पेट्रोलचा काळाबाजार करणाऱ्यांवर अकोला पोलिसांनी कारवाई केली आहे..

गायगाव डेपोमधून चोरलेले पेट्रोल प्लास्टिक कॅनमध्ये भरून एका वाहनातून शहराकडे घेऊन येत असताना अकोल्याच्या डाबकी रोड पोलिसांनी वाहनासह पेट्रोलच्या कॅन जप्त केले आहे. ही कारवाई आज बुधवारी करण्यात आली. पोलिसांनी या प्रकरणी शेख सलिम शेख नदिम (वय २८, रा. अकोट फैल) याला ताब्यात घेतले आहे.आरोपी गायगाव डेपोमधून चोरीचे पेट्रोल वाहनामध्ये घेऊन येत असल्याची माहिती पोलीस निरीक्षक शिरीष खंडारे यांना मिळाली. त्यांनी सहकारी पोलीस कर्मचाऱ्यांसह डाबकी रेल्वेगेटवर नाकाबंदी केली. दरम्यान, रात्री १ वाजताच्या सुमारास समोरुन एमएच ३० एन ७३४० या क्रमांकाचे वाहन येताना दिसले. वाहनचालक शेख सलिम शेख नदिम याला विचारणा केली असता, त्याने उडवाउडवीची उत्तरे दिली. पोलिसांनी वाहनाची झडती घेतली असता, त्यात पेट्रोलच्या १४ लिटरच्या प्लास्टिक कॅन आढळून आले. या कॅनमध्ये एकूण ५६० लिटर पेट्रोल होते. हे पेट्रोल शहरात काळ्या बाजारात विक्रीला जात होते.

पोलिसांनी पेट्रोलसह वाहन जप्त केलं असून त्याच्याविरूद्ध डाबकी रोड पोलीस ठाण्यात गुन्हा दाखल केला आला. ही कारवाई ठाणेदार शिरीष खंडारे, पीएसआय सुनील घुसडे यांनी केली आहे.

८० ते ९० रुपये प्रति लीटर

गायगाव'च्या पेट्रोल डेपो'जवळ पेट्रोलने भरलेली रेल्वे उभी असते. मग, पेट्रोलने भरलेल्या वॅगनमध्ये पाइप टाकला जातो, त्यानंतर काळाबाजार करणारी ही टोळी या वॅगनमधून पेट्रोल चोरी करतात. मध्यरात्रीच्या नंतर या चोरलेल्या पेट्रोलची वाहतूक करून पेट्रोलचा काळाबाजार सुरु होतो आणि या काळ्या बाजारामध्ये पेट्रोलची किंमत ८० ते ९० रूपये प्रति लीटर एवढी ठेवली जाते.