तुम्हाला गिफ्ट मिळणार, लिंक पाठवतो, पुढे घडलं ते धक्कादायक...

जळगाव : जळगावमधील शनिपेठेत ऑनलाईन फसवणूक झाल्याची धक्कादायक घटना समोर आली आहे. मोबाईल वर लिंक पाठवली आणि लिंक वर क्लिक केल्यावर आपणास गिफ्ट मिळेल असे सांगण्यात आले. मात्र, लिंक वर क्लिक करताच दोघांची ऑनलाईन फसवणूक झाल्याचे समोर आलं. याप्रकरणी शनिवारी शनिपेठेत दोन वेगवेगळे गुन्हे दाखल करण्यात आले आहेत.

याबाबत पहिल्या फिर्यादीत राहुल प्रमोद महाजन याने दिलेल्या तक्रारीनुसार, ३० एप्रिल रोजी दुपारी पावणे दोन वाजेच्या सुमारास त्याचे वडील प्रमोद महाजन हे घरी असतांना त्यांना मोबाईलवर २९५३७२३८५ या क्रमांकावरून अनोळखी व्यक्तीचा फोन आला. फोन उचाल्यावर प्रमोद महाजन यांना समोरील व्यक्तीने तुम्हाला गीफ्ट मिळणार आहे. तुम्हाला लिंक पाठवतो. त्या लिंकवर क्लिक करून तुला गिफ्ट मिळेल, असे सांगितले. प्रमोद महाजन यांनी लिंकवर क्लिक करताच त्यांच्या बँक ऑफ बडोदा शाखेच्या खात्यातून तब्बल २६ हजार रुपये ऑनलाईन पध्दतीने दुसऱ्या खात्यात वळवले. फसवणूक झाल्याचे लक्षात येताच याबाबत शनिपेठ पोलीस स्थानकात अज्ञात व्यक्तीविरुद्ध गुन्हा दाखल करण्यात आला असून पुढील तपास पोलीस उप निरीक्षक सुरेश सपकाळे हे करीत आहेत.

तर दुसऱ्या घटनेत लक्ष्मी निलेश राखोंडे यांची ऑनलाईन फसवणूक झाली. ३० एप्रिल रोजी २ वाजेच्या सुमारास त्या घरी असताना त्यांना अज्ञात ७०९३६९८७३९ या क्रमांकावरून फोन आला. राखोंडे यांनी फोन उचल्यावर त्यांना समोरील अज्ञात व्यक्तीने सांगितले की, तुमचे लक्ष्मी किराणा दुकान असून तुम्हाला बिजनेस फोन-पेवर गीफ्ट मिळालेले आहे. मी तुम्हाला पाठवलेल्या लिंकवर क्लिक करा.

राखोंडे यांनी लिंकवर क्लिक करताच त्यांची कोटक महेंन्दा कंपनीचे वीजा कार्ड व खात्यातून तब्बल ३७ हजार ४९५ रुपये ऑनलाईन पध्दतीने सदरची रक्कम ट्रान्सफर करून घेत संबंधित फोनवर बोलणाऱ्याने ऑनलाइन फसवणूक केली. याप्रकरणी देखील शनिपेठ पोलीस स्थानकात अज्ञात व्यक्तीविरुद्ध गुन्हा दाखल करण्यात आला असून पुढील तपास पोलीस उप निरीक्षक सुरेश सपकाळे हे करीत आहेत.