जनरेटर बॅटरीसाठी रुग्णालयातील ६९ नवजात बालकांचा जीव घातला धोक्यात

पंढरपूर: पंढरपूर येथील प्रसिध्द बालरोग रुग्णालयातील (Hospital) गंभीर आणि तितकाच संतापजनक प्रकार समोर आला आहे. रुग्णालयाच्या अतिदक्षता विभागातील जनरेटर स्टार्टर बॅटरी पळवून चोरट्याने उपचार घेत असलेल्या ६९ बालकांचा जीव धोक्यात घातला होता. या प्रकरणी पंढरपूर पोलीस ठाण्यात गुन्हा दाखल करण्यात आला आहे.

पंढरपुरच्या प्रसिद्ध बालरोग रुग्णालयाच्या अतिदक्षता विभागातील जेनरेटर स्टार्टर बॅटरी एका चोरट्याने पळवली. अतिदक्षता विभागात ६९ बालकांवर उपचार सुरु होते. अचानक जनरेटर बंद झाल्याने रुग्णालयातील कर्मचाऱ्यांमध्ये गोंधळ निर्माण झाला. वेळीच पर्याय काढल्याने मोठा अनर्थ टळला आहे.

पंढरपुरमध्ये डॉ. शितल शहा यांचे नवजीवन हॉस्पिटल (Hospital) आहे. येथे नवजात बालकांवर उपचार केले जातात. काल सकाळी रुग्णालयाच्या पाठीमागील बाजूस असलेल्या जनरेटर जवळ मोठा आवाज झाल्याचे इलेक्ट्रिशियन युवराज सावंत यांच्या लक्षात आले. यावेळी त्यांनी पाहणी केली असता बॅटरी कोणी तरी काढल्याचे लक्षात आले.

यावेळी लगेच रुग्णालय (Hospital) कर्मचाऱ्यांनी बॅटरी शोधण्याचा प्रयत्न केला. पण बॅटरी सापडली नाही. दरम्यान बॅटरी काढल्याने अतिदक्षता विभागात असलेल्या ६९ बालकांचा जीवाला धोका निर्माण झाला होता. पण डॉ. शितल शहा यांनी प्रसंगावधान राखत पर्यायी व्यवस्था केली. यामुळे त्या वॉर्डातील बालकांच्या जीवावरील धोका टळला आहे. दरम्यान बॅटरी चोर विरोधात पंढरपूर शहर पोलीस (Police) ठाण्यात तक्रार दिली आहे.