महिलेने शिक्षकाच्या घरातून लंपास केली होती ३ लाखांची रक्कम, पोलिसांनी २ दिवसात घेतलं ताब्यात

नंदुरबार : जिल्ह्यात काही दिवसांपूर्वी एक कुटुंबीय बाहेरगावी गेल्याची संधी साधत महिलेने शिक्षकाच्या घरी धाडसी घरफोडी करून सुमारे ३ लाखांची रोकडसह सोन्याचे दागिने लंपास केल्याची घटना शहरातील कोकणीहील परिसरातील साईबाबा नगरात घडली होती. याप्रकरणी नंदुरबार शहर पोलीस ठाण्यात गुन्हा दाखल करण्यात आला होता. या घटनेने परिसरात एकच खळबळ उडाली होती.

पोलीस सूत्रांकडून मिळालेल्या माहितीनुसार, शिक्षक शिवाजी पितांबर चौधरी हे कुटूंबियांसह शहरातील कोकणीहील परिसरातील साईबाबा नगरात वास्तव्यास असून ते बाहेरगावी गेले होते. ही संधी साधत मोहिनी निलेश पाटील (वय ३२) रा. गणेश नगर, जैन पेट्रोल पंप जवळ नंदुरबार हिने बंद घराच्या दरवाज्याचा कडीकोंडा तोडत आत प्रवेश करून लोखंडी कोठी व प्लायवुडच्या कपाटातून ३ लाख १० हजार रुपयांची रोकड आणि ८ हजार रुपये किंमतीचे २ ग्रॅम वजनाचे सोन्याचे दागिने त्यात एक सोन्याचे बिस्कीट व एक कॉईन असा ऐवज चोरुन नेला होता. शिक्षक शिवाजी पितांबर चौधरी हे आपल्या घरी परतल्यावर त्यांना चोरीचा प्रकार लक्षात आल्यानंतर त्यांनी तात्काळ शहर पोलीस ठाण्याशी संपर्क साधून माहिती कळविली. ही घटना ११ ते १३ मे रोजीच्या दरम्यान घडली आहे.

याबाबत शिवाजी पितांबर चौधरी यांनी नंदुरबार शहर पोलीस ठाण्यात फिर्याद दिली आहे. पोलिसांनी तात्काळ तपासाची चक्र फिरवत शहरातील मोहिनी निलेश पाटील या महिलेला ताब्यात घेऊन मुद्देमाल हस्तगत केला आहे. त्यानुसार महिलेवर गुन्हा दाखल केला असून घटनेच्या अधिक तपास पोलीस उपनिरीक्षक माधुरी कंखरे करीत आहेत.