जिल्हा परिषद शाळेतील शिक्षकाची आत्महत्या, राहत्या घरीच साडीने घेतला गळफास

धुळे : आपल्या राहत्या घरीच वरच्या मजल्यावर झोपण्यासाठी गेलेल्या जि.प शिक्षकाने गळफास घेऊन आत्महत्या केल्याची घटना आज घडली. याबाबत दोंडाईचा पोलीस ठाण्यात नोंद करण्यात आली असून आत्महत्येचे कारण मात्र समजू शकलेले नाही.

दोंडाईचा येथील आदिवासी मुलींच्या वसतिगृहात आदिवासी विद्यार्थिनीने आत्महत्या केल्याची घटना ताजी असतानाच शिंदखेडा तालुक्यातील पथारे गावातील जि.प शाळेत शिक्षक असलेल्या ३६ वर्षीय गणेश फड यांनी दोंडाईचा येथील राहत्या घरीच गळफास घेऊन आत्महत्या केल्याने शिक्षण क्षेत्रात एकच खळबळ उडाली आहे 

दोंडाईचा शहरातील गबाजी नगरमधील रो हाऊसमध्ये जिल्हा परिषद शिक्षक गणेश भागवत फंड हे आपल्या कुटुंबासोबत राहतात. ते मुळ गंगाखेड ता.जि.परभणी येथील रहिवासी असून शिंदखेडा तालुक्यातील पथारे येथील जिल्हा परिषद शाळेत शिक्षक म्हणून गणेश भागवत फंड हे कार्यरत होते.

नेहमीप्रमाणे काल रात्री जेवण झाल्यावर पत्नीशी घरगुती गोष्टींवर चर्चा केल्यानंतर शिक्षक गणेश फंड हे घराच्या वरच्या मजल्यावर झोपायला गेले. सकाळी पत्नी रूपाली फंड यांनी दरवाजा उघडण्याचा प्रयत्न केला असता, दरवाजा आतून बंद होता. त्यामुळे त्यांनी शेजारील लोकांना बोलवून दरवाजा उघडला, यावेळी त्यांना गणेश फंड हे सिलींग फॅनला साडीच्या साहाय्याने गळफास लावलेल्या अवस्थेत दिसून आले.

हे दृश्य बघून पत्नी रूपाली फंड यांनी एकच हंबरडा फोडला. यावेळी जमलेल्या कॉलनीतील लोकांनी पोलीसांना घटनेची माहिती दिली. घटनास्थळी दोंडाईचा पोलीस स्टेशनचे पथक दाखल होत, मयत गणेश फंड यांना उपजिल्हा रूग्णालय येथे शवविच्छेदनासाठी दाखल करण्यात आले आहे. याबाबत दोंडाईचा पोलीस स्टेशनला घटनेची नोंद घेण्यात आली आहे.

मयत शिक्षक गणेश फंड हे मागील पंधरा वर्षापासून धुळे जिल्ह्यातील शिंदखेडा तालुक्यात जिल्हा परिषदेच्या प्राथमिक शाळेत विद्यार्थ्यांना शैक्षणिक सेवा पुरवत होते. ह्या अगोदर त्यांनी वळदे-चवळदे सात ते आठ वर्ष सेवा बजावली. त्यानंतर पथारे येथे मागील चार वर्षापासुन सेवा देत होते. त्यांच्या पश्चात पत्नी, एक मुलगा, एक मुलगी असा परिवार आहे.