विवाहितेला सासरकडुन पैशांसाठी ठार मारण्याची धमकी

तालुक्यातील नशिराबाद येथील माहेर असलेल्या विवाहितेचा माहेरहून १० लाख रुपये आणावेत, यासाठी छळ करून ठार मारण्याची धमकी दिली. याप्रकरणी बुधवारी (ता. ३) दुपारी एकला पतीसह सासरच्या मंडळींविरोधात नशिराबाद पोलिस ठाण्यात गुन्हा दाखल झाला आहे.

नशिराबाद येथील माहेर असलेल्या नम्रता दीपक महाजन यांचा विवाह गावातीलच दीपक विठ्ठल महाजन यांच्याशी झाला आहे. लग्नानंतर काही दिवस चांगली वागणूक दिली. त्यानंतर दीपक याने नोकरीसाठी माहेरहून १० लाख रुपये आणावेत, अशी मागणी केली.दरम्यान, विवाहितेने पैसे आणले नाहीत, म्हणून तिचा मानसिक व शारीरिक छळ केला. तसेच सासू, सासरे, ननंद यांनी पैशांसाठी पिळवणूक केली. हा प्रकार सहन न झाल्याने विवाहिता माहेरी निघून आल्या.

बुधवारी नशिराबाद पोलीस ठाण्यात धाव घेऊन तक्रार दिली. त्यांनी दिलेल्या तक्रारीवरून पती दीपक विठ्ठल महाजन, मालती विठ्ठल महाजन, विठ्ठल शंकर महाजन, हेमलता विठ्ठल महाजन, डिंपल विठ्ठल महाजन (सर्व रा. नशिराबाद) यांच्याविरोधात गुन्हा दाखल झाला आहे. पोलिस नाईक गजानन देशमुख तपास करीत आहे.