शिवसेना ठाकरे गटाच्या महिला आघाडी प्रमुखांनी अन्य दोन साथीदारांच्या मदतीने शेअर बाजारात गुंतवणुकीवर वर्षात दामदुप्पट परतावा देण्याचे आमिष दाखवून ५५ लाखाची फसवणूक केल्याची तक्रार सांगली शहर पोलीस ठाण्यात दाखल करण्यात आली आहे. शिवसेना माजी महिला आघाडी प्रमुख सुंनिता मोरे यांनी ही तक्रार दाखल केली आहे.
सांगलीमध्ये सह्याद्री ट्रेडर्स अ‍ॅण्ड डेव्हलपर्स या नावाची कंपनी काढून एक वर्षात दामदुप्पट परतावा देण्याचे आमिष दाखवून गुंतवणूक दारांची फसवणूक करण्यात आली असल्याचे श्रीमती मोरे यांनी तक्रारीत म्हटले आहे. कंपनीच्या संचालक सुजाता इंगळे, मनोज पाटील ( रा.आष्टा) आणि सचिन यादव (रा. चोपडी, ता.सांगोला) या तिघाविरूध्द शहर पोलीस ठाण्यात गुन्हा दाखल करण्यात आला आहे. श्रीमती मोरे यांनी ३३ लाखाची गुंतवणूक केली होती. या गुंतवणूकीच्या परताव्यापोटी २९ लाखांचे धनादेश देण्यात आले होते. तसेच नोटरीही करून देण्यात आली आहे. मात्र, पाच लाख ९७ हजार रूपयांचा परतावा देण्यात आला. त्यानंतर पैसे व अथवा परतावा दिलेला नाही. तसेच शिवसेना ठाकरे गटाचे जिल्हा संघटक बजरंग पाटील यांनी १४ लाख तर महेश मासाळ यांनी १४ लाख ६० हजार रूपयांची गुंतवणूक या कंपनीमध्ये केली. मात्र, परतावा अथवा मूळ मुद्दल मिळालेली नाही. एकूण ७१ लाख २० हजाराच्या गुंतवणुकीपोटी १५ लाख ५७ हजार रूपयांचा परतावा मिळाला असून उर्वरित ५५ लाख 63 हजार रूपये दिलेले नाहीत. यामुळे आमची फसवणूक झाली असल्याचे श्रीमती मोरे यांनी तक्रारीत म्हटले आहे.
0 Comments