प्रशांत धोंडबाजी ठाकरे (वय २५ वर्ष, रा. आंबोली, ता. चिमूर, जिल्हा चंद्रपूर) असे बुडून मृत्यू पावलेल्या युवकाचे नाव आहे. प्रशांतच्या आजी मैनाबाई मनिराम पोटे (रा आंबोली) यांचे नुकतेच निधन झाले होते. त्यामुळे प्रशांत आज (सोमवार) सकाळच्या सुमारास आजीचे अस्थी विसर्जित करण्यासाठी पवनी येथील वैनगंगा नदीच्या वैजेश्वर घाटावर आला होता.
अस्थी विसर्जन झाल्यावर आंघोळ करण्यासाठी तो नदी पात्रात उतरला. मात्र तेव्हा खोल पाण्याचा अंदाज न आल्यामुळे पाण्यात बुडून त्याचा मृत्यू झाला. दरम्यान त्याचा मृतदेह न सापडल्याने याची माहिती पवनी पोलिसांना देण्यात आली. रेस्क्यू टीमकडून शोध सुरु करण्यात आला. त्यानंतर 3 तासाने मृतदेह बाहेर काढण्यात आला आहे.
फिर्यादी रघुनाथ गजानन पोटे (35) रा सिरपुर, ता उमरेड यांच्या तक्रारीवरून पोलिसात नोंद करण्यात आली असून मृतक प्रशांत याच्या मृतदेहाचे शवविच्छेदन करून मृतदेह नातेवाईकांच्या स्वाधीन करण्यात आला आहे. अधिक तपास पवनी पोलिस करीत आहेत.
दरम्यान, रायगड जिल्ह्यात कोलाडजवळ असलेल्या डोलवहाळ धरणात पोहण्यासाठी गेलेल्या २१ वर्षीय तरुणाचा बुडून दुर्दैवी मृत्यू झाल्याची घटना दोनच दिवसांपूर्वी समोर आली होती. पर्यटनासाठी आलेला हा तरुण बुडाल्यानंतर परिसरात खळबळ उडाली. मोहम्मद असिफ अब्दुल रहमान खान (वय २१ रा. तळेगाव जिल्हा पुणे) हा मूळचा पश्चिम बंगालमधील कोलकत्याचा राहणारा होता. मावशी मोमीन खातून, मावस भाऊ एयाज खान आणि अय्यज खान, मावस बहीण बुशरा हाफीजूर रहमान खान (रा. धारावी, मुंबई) यांच्यासोबत तो डोलवहाळ धरण व परिसरात पर्यटन करण्यासाठी आला होता.
0 Comments