दगड काढताना डोंगरावरून जेसीबी खाली कोसळला, चालकाचा जागीच मृत्यू

नाशिक : खडीक्रशरसाठी डोंगरावरून दगड काढताना जेसीबी खाली पडून चालकाचा जागीच मृत्यू झाल्याची हृदयद्रावक घटना मनमाड पासून जवळ असलेल्या अनकवाडे येथे घडली. रोहित चव्हाण (वय 35)असे या चालकाचे नाव आहे. अचानक घडलेल्या या घटनेमुळे अनकवाडे गावावर शोककळा पसरली आहे.

जेसीबीवरचा ताबा सुटल्याने घडली घटना...
याबाबत अधिक माहिती अशी की, मनमाड पासून ८ किमी अंतररावर अनकवाडे शिवारात खडीक्रशरसाठी डोंगरावरून दगड काढले जात असून रोहित चव्हाण हा जेसीबी घेऊन डोंगरावर गेला होता. दगड काढत असतांना एक दगड सरकला त्यामुळे रोहितचा जेसीबीवरून ताबा सुटला आणि जेसीबी थेट सुमारे १०० फुटांवरून खाली कोसळला.

दुर्दैवी घटनेमुळे अनकवाडे गावावर शोककळा...

घटनेची माहिती मिळताच इतर कामगार, मजुरांनी घटनास्थळी धाव घेऊन रोहितला तातडीने शासकीय रुग्णालयात दाखल करण्यात आले. मात्र, इतक्या उंचावरून पडल्यामुळे रोहितच्या डोक्याला जबर मार लागला होता. त्यामुळे त्याची जागीच प्राणज्योत मावळली होती. त्याच्या पश्चात पत्नी, आई, वडील, तीन भाऊ, दोन बहिणी असा परिवार असून अचानक घडलेल्या या दुर्दैवी घटनेमुळे अनकवाडे गावावर शोककळा पसरली आहे.